بِسْمِ اللهِ الرَّحْمٰنِ الرَّحِيْمِ

Bismillah ir-Rahman ir-Raheem

Islam ek mukammal zindagi ka nizaam hai jo insaan ko sirf ibadat hi nahi, balki akhlaq, mu'asharti rawaiye, insaaf aur rehmat ka dars deta hai. Yeh deen Allah ki taraf se aakhri paigham hai jo Nabi Muhammad ﷺ ke zariye tamam insaaniyat tak pohchaya gaya.

Haqeeqat Ki Talaash

"Islam Asal kamiyabi ka rasta hai. Duniya aur Aakhirat meii kaamyabi ka asal tareeqa"

Kisi par majboori nahi ke woh Haq ko maanay, magar ye aqal ke liye afsos ki baat hai ke insaan is baat meii bhi dilchaspi na le ke asal Haq kya hai!

Islam yeh sikhata hai ke hamaray Khaliq ne humein aqal aur samajh di hai, aur yeh hamari zimmedari hai ke hum sochain, samjhein aur tehqiqat karein. Koi aapko Islam ki taleemat maan’ne par majboor nahi kar sakta, kyunki Islam ka kehna hai ke har shakhs ko apni marzi ka ikhtiyar diya gaya hai.

Magar kya aap ka ilm Islam ke mutaliq mukammal hai? Kya aapne sirf doosron ki suni sunai baatein sun kar Islam ke mutaliq raye bana li hai? Kya yeh munasib hai ke koi shakhs kisi khaas khaane ka maza sirf doosron ki baaton par bharosa kar ke bata de, jabke usne khud kabhi na smjha ho?

Isi tarah, Islam ko samajhne ke liye sirf sunne ya parhne se zyada zaroori hai ke aap is par khud sochain, aur isko samajhne ki koshish karein. Yehi aqalmandi ka tareeqa hai.

Islam aapko yeh yakeen dilata hai ke aapke ikhtiyaar aur sochnay samajhnay ki azadi ka ehtram kiya jayega. Koi bhi aapko majboor nahi karega ke aap apne Khaliq ki marzi ko manne par majboor ho jaayein. Yeh faisla aapko khud karna hoga!

Haqeeqat Ka Noor

Zindagi Kya Hai?
Insaan ka is duniya meii aana, aur yeh saari kainaat sirf ek ittifaq ya bina kisi mansuba-bandi ke nahi bani. Yeh poori kainaat, iska har zarra, ek Rehmat aur Qudrat rakhne wale Khaliq ka saboot hai. Baghair Khaliq ke, kuch bhi wajood mei nahi aa sakta.

Har shakhs ko pata hai ke woh mojood hai, magar woh khud apni hasti ka malik nahi hai. Isi liye, uska farz hai ke woh apne Malik, apne Khaliq ko pehchane.

Insaan Ka Maqam

Allah ne insaan ko aqal aur samajh di, jo usey tamaam makhlooqat se behtar banati hai. Usko bhalai aur burai mei tafreeq karne ki salahiyat di gayi, aur usey ye azadi di gayi ke woh apna rasta khud chune.

Insaan paak aur gunahon se mehfooz paida hota hai, magar usko ye ikhtiyar diya gaya ke woh neki ka rasta ikhtiyar kare ya burai ki taraf jaye.

Ilahi Hidayat

Hamare Mehboob Khaliq ne insaan ko sirf aqal aur samajh de kar akela nahi chhorha. Unhoney insaan ki rehnumai ke liye paighambar bheje, jo Allah ka paigham insaan tak pohnchate rahe.

Magar afsos, guzashta zamane ke logon ne in paighamon ko bigaad diya, un meii khud se milaawat kar li. Is wajah se Allah ka asal paigham, jo sirf ek Allah ki ibadat aur unki ita’at tha, gum ho gaya.

Lekin Allah ne insaan ko chhorha nahi. Jab duniya zulmat aur jahalat ke andheron meii doob chuki thi, to Allah ne apne aakhri Paighambar Muhammad ﷺ ko bheja, aur apni aakhri kitaab Quran nazil ki, jo qayamat tak hidayat ka sabse mukammal zariya hai.

Haq Ki Pehchan, Sahi Taleem Ka Mayar

Quran e Kareem Allah ka asal aur mukammal paigham hai. Iski sachaai ko jaanchne ke liye kuch mayar hain:

1. Aqli Taleem: Islam ki taleemat har aqalmand shakhs ko samajh aati hain. Haqeeqi wahi woh hoti hai jo aql se mutabiqat rakhti ho.

2. Kamal aur Beghalti: Quran ek beghalti kitaab hai jo kisi bhi nuqs, ghalti, tazad ya mukhtalif versions se mehfooz hai.

3. Haqeeqi ilahi kitaab koi jhooti kahaniyan, waham ya shirk nahi hota.

4. Science Ke Mutabiq: Quran ek ilahi kitaab hai jo ilm aur science ka muqabla kar sakti hai aur har daur ke ilmi imtehanat par poori utarti hai.

5. Sahih Paishangoiyan: Quran wohi batata hai jo sach hai, aur jo usmeii batai gayi paishangoiyan hain, woh waqai puri hoti hain.

6. Benaamuni: Quran ek aisi kitaab hai jo insaan likh nahi sakta, uski misaal koi bhi nahi bana sakta.

Islam Kya Hai?

Aap kabhi sochte hain ke yeh poori kainaat ek mansuba-bandi ke bina kaise chal sakti hai? Har shehar ka ek hukmran hota hai, har mulk ka ek nizam hota hai, to phir yeh sari kainaat bina kisi mansuba ke kaise mojood ho sakti hai?

Allah woh hai jo har cheez ka malik hai, jo har cheez banata hai, aur jo har cheez ko chalata hai.
Woh insaan nahi, koi shakhs nahi, koi bhut nahi, koi tasveer nahi, kyunki jo khud bana ho, woh khaliq nahi ho sakta.

Islam ka asal matlab hai sirf ek Allah ki bandagi aur unke hukm ko maanna. Yeh woh paigham hai jo Hazrat  Adam se lekar Hazrat Muhammad ﷺ tak tamam paighambaron ne diya.

Islam Ki Bunyadi Aqeeday (Iman Ke 6 Arkān)

1. Allah ki Wahdaniyat – Sirf Allah hi sab kuch banane wala hai. Na unka koi beta hai, na baap, aur na hi koi unka humsafar hai.

2. Paighambaron par Iman – Har ummat ko ek paighambar diya gaya, aur Muhammad ﷺ aakhri paighambar hain.

3. Asli Ilahi Kitaabon par Iman – Pehle bheji gayi kitaaben logon ne badalaw kr diye, sirf Quran Allah ka asal aur mehfooz paigham hai.

4. Malaika par Iman – Allah ke farishte noorani makhlooq hain, jo sirf Allah ke hukm se kaam karte hain.

5. Qayamat ka Din – Ek din duniya khatam ho jayegi, aur sabko Allah ke samne jawab dena hoga.

6. Taqdeer par Iman – Har cheez Allah ki maslihat aur ilm se hoti hai, insaan ka kaam sirf koshish karna hai.

Islam Ke 5 Buniyadi Amal (Islam Ke 5 Rukn)

1. Shahadat: La ilaha illallah, Muhammadur Rasoolullah.

2. Namaz: Rozana 5 waqt namaz ada karna.

3. Zakat: Apni maal ka ek hissa gareebon ko dena.

4. Roza: Ramazan mein roza rakhna.

5. Hajj: Agar mumkin ho to zindagi mein ek martaba Makkah ka safar karna.

Islam, Asal Kamiyabi Ka Rasta

Islam sirf ek mazhab nahi, yeh poori zindagi ka nizaam hai jo insaan ko duniya aur aakhirat dono mei kamiyabi ki taraf le jata hai.

Jo Islam ko samjhega, woh asal sachai tak pohanch jayega!