Advice

Quran ek aisi kitaab hai jo har Musalman ki asal rehnumai hai. Har lafz, har harf Allah ka bayan hai, us ka paigham hai, us ki rehmat hai. Yeh woh kitaab hai jismei ilm ka samandar chhupa hai, jismei har sawal ka jawab hai, jismei lafzon ka jadoo nahi, balkey ek noor hai jo dil aur rooh ko roshan kar deta hai. Quran sirf padhna nahi, samajhna zaroori hai. Sirf tarjuma nahi, tafseer bhi zaroori hai. Har Musalman ka haq hai ke woh khud is ilm ko hasil kare, taake woh sirf sunnay ya parhnay tak mehdoood na rahe, balki haq ko pehchaan sake.

Aaj ka zamana fitnon se bhara hai, shak o shubhat ka door hai. Har jagah naye naye nazariyat, naye naye tafsirein, naye naye sochnay ke tareeqay. Magar asal deen woh hai jo roshni de, jo izzat aur mohabbat sikhaye, jo sachai aur insaf ka paigham de. Quran wo asal daleel hai jo har shak ko mita deti hai, har musalman ka imaan mazboot karti hai. Is liye, agar hum chahte hain ke hamari aanay wali nasal sirf naam ki Musalman na ho, balkey asal Musalman bane, toh humein apni jarh mazboot karni hogi. Aur jarh sirf Quran se, sunnat se, hadith se mazboot hoti hai.

Mujhe sirf is baat ka dukh hota hai ke aaj humari nasl apni pehchaan bhoolti ja rahi hai. Maa-baap jab khud Islam ko samajhne ki koshish nahi karenge, toh aulad ko kya sikhayenge? Jab gharon mei Quran sirf rakha rahega, parhna aur samajhna maqsad nahi hoga, toh phir shakhein kaise mazboot hongi? Ek maa agar Islam ko samjhegi, ilm hasil karegi, tafseer parhegi, toh woh apni aulad ka imaan bhi itna mazboot karegi ke koi fitna unke zehno ko hila na sake. Jab ek baap apni ghairat, haya aur izzat ko samjhega, toh uska beta bhi asal mard hone ka matlab samjhega. Mard ki bhi haya utni hi zaroori hai jitni ek aurat ki. Mard or aurat ki ghairat yeh nahi ke woh social media pe apni tasveerein daal kar izzat dikhaye, balki yeh hai ke woh apne imaan ki hifazat kare, apne ghar walon ka muhafiz bane, apni aulad ko asal deen ka ilm de.

Quran ek baar parhne ki kitaab nahi. Yeh wo kitaab hai jo jitni baar parho, naya ilm milta hai. Jitni baar samjho, naya noor milta hai. Jitni baar socho, nayi gehraiyan samajh aati hain. Yeh Allah ka kalaam hai, is mei har sawaal ka jawab hai, har mushkil ka hal hai, har insaan ke liye rehnumai hai. Sirf sunna nahi, sirf doosron ki baat pe yaqeen nahi karna, khud parhna hai, khud samajhna hai. Tafseer parho, hadith samjho, sahaba ki zindagi dekho, ahle-bayt ka tarz-e-zindagi samjho, tab’ieen aur taba-tab’ieen ka ilm dekho. Yeh sab asal deen ki misaalein hain.

Mujhe kayi log kehte hain ke itni tehqiqat mat karo, apna firqa bana logi molvi ki suno. Magar sach batao, kya tehqiqat ka haq mujhe Quran ne nahi diya? Kya Allah ne khud nahi farmaya ke samjho, ghooro fikr karo? Kya Rasool Allah ﷺ ne nahi kaha ke ilm hasil karo? Yeh jo aj kal har jagah naye naye kitabein likhi ja rahi hain, har baat mei naye naye masael dale ja rahe hain, in sab ko samajhne se pehle humein Quran ko samajhna hoga, taake humein pata chale ke asal haq kya hai.

Mujhe sirf ek hi baat ka dar hai… ke kahin hum sab deir na kar dein. Kahin yeh na ho ke hum duniya ke fitnon mei ulajh jaayein aur asli noor kho dein. Kahin yeh na ho ke maut saamne aa jaye aur hum tayyar na hon. Kya humari ungliyon ne tasbeeh utni baar gini jitni dafa humne gunah gine? Kya humne Allah ka zikr utni baar kiya jitni dafa humne behooda baten ki hain? Kya humne apne Rab ki mohabbat ko utna mehsoos kiya jitna humne duniya ki mohabbat ki hai?

Mujhe abhi sajde karne hain, mujhe abhi roshni tak jaana hai, mujhe abhi imaan ko itna mazboot banana hai ke duniya ki koi aandhi, koi fitna, koi shak usse hila na sake. Mujhe abhi Quran ko dil mei utarna hai, Mujhe abhi itna mazboot hona hai ke sirf ek mohabbat rahe, sirf aur sirf Allah ki mohabbat.

Agar yeh paigham ap tak pohonchta hai, toh khud ko badalne ka waqt abhi hai. Apni nasl mazboot karo, apni jarh itni gehri karo ke shakhon tak noor pohnche. Ilm hasil karo, haq ki talash karo, imaan ko mazboot karo. Yeh duniya sirf ek imtihan hai, asal manzil sirf Allah hai. Ashiqi karni hai, toh us Rab se karo jo asal hai, jo be-niyaaz hai, jo malik hai, jo rehmaan aur raheem hai.

Aur agar ap samajh sako, toh sirf ek baat yaad rakhna, Jis din apka imaan itna mazboot ho gaya ke ap sirf Allah k ho gaye, us din ap duniya ki kisi fitnay se nahi daroge.

Ya Allah, Ya Rehman, Ya Raheem, Teri rehmat har zarre ko roshan karti hai, aur teri mohabbat har saans mei barasti hai. Teri qudrat har dil ki dhadkan mei gunjti hai, aur tu har waqt hamare saath hai. Tera Noor zindagi ke andheron ko roshni mei badal deta hai, aur teri hidayat dilon mei sukoon bhar deti hai.

Ya Malik-ul-Mulk, Ya Quddus, Tera hukm har jahan par hai, magar teri inayat un takhton tak mehdoood nahi jati. Tera karam un par bhi barasta hai jo zameen par giraye gaye. Teri azmat ka taj har bande ke sir par sajta hai, magar asal azmat unhi ko milti hai jo teri rahmat ki talaash mei hain.

Ya Noor, Ya Hadi, Tere Noor ki sirf ek kiran andheron ko mitane ke liye kaafi hai. Tera zikr dilon ko narm aur roohon ko roshan karta hai. Teri hidayat har bhatakte hue insaan ko raste par le aati hai, aur jo tujh tak pohanch jaye, wo kabhi bhatak nahi sakta.

Aur Ya HabeebAllah, Ya Rahmatul-lil-Alameen ﷺ, Tere pyare Rasool ﷺ ki sunnat hidayat ki raah hai. Unka zikr dil mei ashiqana jazba jagata hai, ankhon mei ashk bhar deta hai, aur rooh ko ek ajeeb si lazat se bhar deta hai. aur unke labon se nikalne wali har baat haq hai. Unki mohabbat ka sirf ek jhalak duniya aur aakhirat dono ke liye kaafi hai.

Ya Allah, humein Ya RasoolAllah ﷺ unke raste par chalne ki taufeeq de, aur us din unka qurb nasib kar, jis din sab mohabbat ke talib honge. Ameen ya Rabb-ul-Alameen. 💖✨