السَّلاَمُ عَلَيْكُمْ وَرَحْمَةُ اللهِ وَبَرَكَاتُهُ

Ek Nasihat Qaum ke Naam 

Aaj jo kuch Falasteen (Palestine) mei ho raha hai, woh sirf zulm ka nateeja nahi, balki hamari khamoshi ka saboot hai. Ummat-e-Muslima k imaan ki roshni bujh si gayi hai. Hum kehte hain, "Humare haath mein kuchh nahi..."  lekin yeh sirf ek bahana hai, ek afsos-naak taur par qeemti waqt aur amal k zaya ki wajah.

Imaan agar jag jaye, toh taqdeerein badal jaati hain. Aur jab deen dil mei utar jaye, toh firaun bhi gir jaate hain. (Na lashkar tha, na hathiyar, Sirf imaan,Toh firaun ka pura nizaam samundar ke andar dub gaya.)  Magar humne toh sirf hukmaranon ko dosh diya, jab k asal hukoomat toh har shakhs ke dil mei hoti hai. Imaan ki chingari agar har dil mei jag jaye, toh zulm apne aap hi jal kar khaak ho jaata hai.

Aurat, Ghar ki Jarrh, Nasl ki Pehchan

Jab tak hamari behnein apni khoobsurti ko dikhane ko azadi samajhti rahengi, jab tak unki awazein be-haya honay mein taraqqi samjhi jaayengi, us waqt tak nasl-e-imaan paida nahi ho sakti. Aurat ek madarsa hai, uski godh mei pal kar ya toh Mujahid paida hota hai, ya munafiq.

Aurat ko 15–20 saal pehle se tayyar hona hota hai, taake jab waqt aaye, toh woh sirf maa na ho, Woh maa jo apni aulaad ko sirf palti nahi, deen ki khushboo se seencha karti hai. Jis maa ne Quran ko sirf padh kar nahi, je kar seekha ho woh jab talaffuz sikhaaye, toh Kalma dil mei utar jaaye. Woh maa jo haya ka parda hai aur gahirat ka mayni smjhati hai. Woh maa jo waqt se pehle tayyar hoti hai. apne liye nahi, ek nasl ke liye, ek Ummat ke liye.Uska har qadam, har soch, har dua, ek imaarat hai. Aur jab maa hijab mei sirf kapda nahi, maqam, hukum samajh kar leti hai, toh us hijab ke saaye mei iman ke sipahi palte hain. Jab aurat be-haya ban jaaye, toh puri nasl be-raah ho jaati hai. Aur jab aurat deen ki roshni se chamakne lage, toh uske har kadam se rehmat barasti hai. Woh sirf bachay nahi paalti, woh mujahid, aalim, AllAh ki raah mei shaheed honey waly paida karti hai. Aur sab se bara maqam? Jab Allah ke samne woh maa keh sakey Ya Allah, meri aulad teri rah mei thi. Mera ghar, mera waqt, meri zindagi, sab maine tere deen ke liye waqf ki. Jab tak aurat apna mujra, apna dikhawa, aur apne nakhron ko chhorh kar deen ki roshni mei nahi chalegi, tab tak uski godh se Ummat ka sipahi paida nahi hoga. Jab aurat be-haya hogi, toh mard be-ghairat hoga. Jab maa gumrah hogi, toh nasl barbaad hogi.

Mard Jisne Ghairat Kho Di

Aur mard? Aaj ke mard ne apni ghairat ko music aur group chats mei bech diya hai. Woh selfies aur shirtless tasveerein daal kar sochtay hai ke woh kuch zyada hi haseen ban gaya hai, jab ke asal mei usne apna wajood kho diya hai.

Group chats mei reh kar jis tarah se nafrat, desires, aur haram baatein chalti hain, woh sirf gunnah nahi, ek nasl ki tabahi ka aaghaz hai. Har woh shakhs jo aise group ka hissa hai, (banaye ya chale), woh is fitne ka zimmedar hai.

Abhi bhi waqt hai. Khud ko behtareen banao. Khud ko is qabil karo ke tumhari aulad tum par fakhr kare. Ke jab fitna dajjal samne ho, toh tumhari nasl imaan ke saath uske samne khadi ho.

Yeh waqt hai jagne ka. Nahi toh waqt guzar jaayega, aur sirf afsos reh jaayega.