Qiyamat ki nishaniya

Aaj hum sab ko in nishaniyon par gaur karna chahiye, aur apni zindagi ko behtar banane ki koshish karni chahiye. Yeh waqt hai ke hum apne raaste ko daryaft karen, aur apne Rasool ﷺ ke paigham ko apni zindagi mei amal mein laayen.

Aakhri Zamane Ki Nishaniyan – Nabi Kareem ﷺ Ki Batayi Hui Haqiqat Ka Aaina

Rasoolullah ﷺ ne irshad farmaya k qayamat se qareeb ek aisa waqt aayega jab insaan safar mei is qadar tezi ikhtiyar karega ke woh hawa mei udne wale badalon ki tarah hoga. Aaj hum is nishani ko bilkul waazeh taur par dekh rahe hain. Jahaz, bullet trains, aur futuristic transport systems ki surat mei insaan lambe faslay chand ghanton mei tay kar leta hai. Nabi ﷺ ne farmaya ke woh aise sawari par hoga jo badalon jesi hogi  is ka matlab hai ke woh upar, zameen aur asmaan ke darmiyan hoga, jaise aaj ke airplanes hain. Yeh sawari itni advanced hogi ke insaan apne safar ke dauran zameen aur asmaan ke logon se sawal karega, lekin uska amal us ke liye maqbool nahi hoga. Nabi ﷺ ne farmaya tha ke qiyamat ke qareeb log badlon aur zameen ke darmiyan chalang lagayenge, jaise aaj ke daur mei log plane se skydiving karte hain. yeh is taraf ishaara hai ke akhirat ki taraf laaparwahi barh jaye gi. Nabi ﷺ ne farmaya ke aik waqt aayega ke jahan kal tak charwahay, reth mei jaanwar charane wale log thay, wohi aapas mei unchi imaratein banane ka muqabala karenge. Aaj ke dor mei agar hum Dubai, Abu Dhabi, Riyadh, Doha jaise Arab shehron ko dekhen to yeh sab kuch sabit hota hai. Jahan ek waqt mei insaan sirf apni zarurat ke liye makaan banata tha, wahan aaj duniavi shaan dikhane ke liye asman ko choone wali imaratein banayi ja rahi hain. Burj Khalifa aur Neom City is nishani ka zinda saboot hain.

Rasoolullah ﷺ ne bataya ke Arab ki zameen dobara sabz ho jayegi, wahan nadiyan aur khetein ugengi. Aaj Saudi Arabia, UAE aur doosre Arab mumalik mei artificial irrigation aur technology ke zariye registanon ko sabz zameen mei badla ja raha hai. Wahan jahan kabhi pani ka naam-o-nishan nahi tha, aaj modern technology ke zariye kheti ho rahi hai. Yeh bhi qayamat ki ek waazeh nishani hai.

Nabi ﷺ ne zikr kiya, ek fitna uthayega jo har Arab ke ghar tak pohanchayega. Aaj ka media, social networks, aur ideologies ki jang ne har ghar ko fitnon ka markaz bana diya hai. Deen ka ghalat tasawwur, firqay bandi, aur dushmani is fitne ke shanakht hain, mardon ka nachna, concerts hoty hai, har taraf sy girah ho aisi tasveer nazar ati hai humey aj k daur mei.

Rasoolullah ﷺ ne kaha ke deen ki samajh aur ilm ka faasla barh jayega. Mazhabi jahalat aam ho jayegi. Aaj logon ne deen ko sirf ek rasm bana diya hai. Aurat haj karegi magar us ke sath koi mard na hoga, yeh bhi aaj ke zamanay mei dekhne ko milta hai jahan digital aur individual safar ki sahulat ne is hadith ko bhi haqeeqat bana diya hai.

Qayamat se qareeb aisi halat hogi ke maa apne bache ki ghulami karegi, iska matlab hai ke bachay maa baap par hukam chalayein ge. Aaj ke dor mei aulad apne walidain ko izzat dena chor chuki hai, unki baat ko nazar andaz karte hain, aur apni marzi chalate hain.

Duniya daari is qadar barh jayegi ke daulat ko zindagi ka asli maqsood samjha jayega. Log gurbat se nafrat karenge aur daulat ke milne ke baad na-shukri ka rawayya ikhtiyar karenge. Aapas mei izzat khatam ho jayegi aur log aik dusre ko hakeer samjhenge. Kisi ki qabar ke paas se guzarne wala insaan kahega ke kaash main iski jagah hota, yaani gham, depression, aur zindagi se mayoosi itni barh jayegi ke maut ki tamanna aam ho jayegi.

Imandari haram ho jayegi, aur sirf be-imaan log hi izzat payenge. Eitmaad aur yakeen ki buniyad khatam ho chuki hogi. Hukoomat un logon ke haath mei hogi jo is ke haqdar nahi. Aaj bhi duniya bhar mei aise logon ke haath mei iqtidaar hai jo na imandari rakhte hain na ilm.

Masjidon mei log jama honge, lekin unka koi rehnuma nahi hoga, aaj ki namazon mei roohaniyat ki kami, aur leadership ka fasaad, is nishani ka saboot hai. Aurat apne shohar ke karobar mei madad karegi, jo ke aaj ke business partnerships aur economic roles mei aam baat hai.

Tijarat itni barh jayegi ke har choti badi cheez mei lena-dena aur munafa dekhna logon ka maqsad ban jayega. Zina aam ho jayega, aur aaj porn industry, social media aur liberal values ki wajah se ye khatarnaak nishani poori ho chuki hai. Sharab ka aam hona, dance aur nightlife ka culture, waqt ka barhawa tezi se hona, ye sab us dor ki tasveer hai jo Nabi ﷺ ne hamein dikhayi.

Qatl aur khudkushi aam ho jaye gi, log maarenge lekin unhe maloom nahi hoga kyu, aur jo marenge unhein samaj nahi aayega ke unhein kyu mara gaya. Yeh terrorism, random shootings aur violence ka saboot hai.

Auratein aise kapre pehnegi ke woh pehn kar bhi nanghi nazar aayengi, aaj ke fashion aur modelling culture mein yeh nishani poori ho chuki hai. Auratein dunia ki khwahish mein apne asli maqsad se hat chuki hain.

Jhooti gawahi, sach ka chhupaya jana, maa baap ki na-farmani, biwi ki itaat aur Walid (baap) sy upar doston ko tarjeeh, yeh sab aam ho gaya hai. Sood lena dena jaise haram kaam bhi halal samjhe ja rahe hain. Log haram-o-halal ka farq guma chuke hain.

Masjidein sajayi jaengi, lekin logon ke dil khali honge, aaj masjidon mei roohani khushi nahi, sirf raftar aur zahiri sajawat reh gayi hai. Mehr ka khatam ho jana, mohabbat aur insaniyat khatam ho jayegi. Bhai bhai hoke bhi ek dusre se razi nahi honge. Na-jaiz aulad ki bharmaar hogi. Hum-bistri sirf maza ke liye hogi, zimmedari aur ahd ke bagair. Log khule aam fuhash harkatein karein ge.

Takriban 30 jhootay dajjal zahir honge jo apne aap ko Rasool hone ka dawa kareinge, aur aaj bhi aise log har zamane mei uth rahe hain. Zameen sona aur chaandi ugley gi, duniya itni daulatmand ho jayegi ke log paison mein doob jayein ge.

Aakhri waqt mei mo’min ka khwab jhoota nahi hoga,  jese jese waqt kareeb aayega, neik logon ke khwab haqeeqat banenge. Jitna insaan sachcha hoga, uske khwab utne hi sachche honge.

Rasoolullah ﷺ ne bataya ke qaumein tum par hamla karne ke liye tumhein dawat ki tarah pukarein gi, jaise log khanay ki dawat dete hain. Islam sirf ek naam reh jaayega, Quran sirf zubaan tak simat jaayega, log us par amal nahi karein ge. Deen logon ke dil se chala jaayega, sirf unki zubaan tak reh jaayega. Aur log ikhtilaf mei itne barh jaayenge ke deen mei ek saath rehna mumkin nahi hoga.

Nabi ﷺ ne farmaya tha ke qiyamat ke qareeb maal ki farawani ho jayegi, aur koi bhi shakhs zakat lena pasand nahi karega. Jab zakat kisi ko pesh ki jayegi, to wo kahayega, "Mujhe is maal ki zarurat nahi hai." World Economic Forum ki recent report ke mutabiq, 2050 tak duniya se extreme poverty khatam ho sakti hai. Duniya mein faqa aur gareebi ke halaat behtareen ho rahe hain, aur yeh wahi paigham hai jo Nabi ﷺ ne qiyamat ke waqt ki nishaniyon mei se diya tha.

Rasool Allah ﷺ ne ek aur nishani ka zikar farmaya tha, aur woh yeh thi ke qiyamat ke qareeb jungli janwar insano se baat karne lagenge. Aaj ke dor mei, artificial intelligence (AI) ki madad se scientists janwaron ki awazon aur body language ko decode kar rahe hain. Yeh technology insano ko janwaron ke saath baat karne mei madad de sakti hai. AI ki madad se ab hum janwaron ke emotions aur needs samajh sakte hain. Yeh wahi baat hai jo Nabi ﷺ ne apni hadith mei farmayi thi. Yani hum aane wale waqt mei yeh dekh sakte hain ke insaan janwaron se baat kar sakta hai, jo ki unke liye aik nayi duniya ka darwaza khol sakti hai.

Rasool Allah ﷺ ne yeh bhi farmaya tha ke qiyamat ke qareeb Darya-e-Furaat (Euphrates) apna sona zahir karega aur log is sona ko hasil karne ke liye apni jaan tak daav par laga denge. Aaj hum dekhte hain ke Darya-e-Furaat sukhta ja raha hai. Yeh darya jo Turkey, Syria aur Iraq se guzar kar behta hai, ab apni normal level se kaafi neeche ja chuka hai. 2021 mein Iraq ke Minister of Water Resources ne kaha tha ke climate change aur regional conflicts ke sabab, yeh darya 2040 tak bilkul sukh sakta hai. Is waqt bhi log is darya ke qareeb sona talaash kar rahe hain, jaise ki ek video mei logon ko sona nikaalte hue dikhaya gaya. Yeh sab cheezain wohi nishaniyan hain jo Nabi ﷺ ne pehle hi bata di thi, aur hum aaj unko apni aankhon se dekh rahe hain.

Nabi ﷺ ne apni hadith mei farmaya tha ke qiyamat ke qareeb auraton ki tadaad itni barh jayegi ke 50 auratein ek mard ke zimme hongi. Aaj ke dor mein, duniya ke kai mulkon mein mardon aur auraton ki abadi mein farq ab kafi zyada nazar aa raha hai. United Nations ki recent report ke mutabiq, 2050 tak auraton ki abadi mardon se zyada ho jayegi. 

Nabi ﷺ ne farmaya tha ke qiyamat se pehle aik bohot badi jang hogi jismein do azeem groups apas mei ladenge, aur dono taraf se bohot zyada halakatein hongi. Yeh jang dono groups ke beech ik hi mazhabi aqeede par ho gi. Aaj hum dekhte hain ke duniya mein kai mazhabi aur political conflicts barh rahe hain, aur yeh jang duniya ke kai regions mein ho sakti hai. Aaj bhi hum apne aas paas dekh rahe hain ke aise halat bana rahe hain jo is jang ka saboot hain. Is jang ke baad mardon ki tadaad mein mazeed kami hogi, jaisa ke Nabi ﷺ ne farmaya tha. Yeh aik aur nishani hai jo humare samne aa rahi hai, ya bohot jald aney wali hai.

Nabi ﷺ ne yeh bhi farmaya tha ke qiyamat ke qareeb zina, yani haram kaam, khule aam aur qanoonan jaiz ho jayega. Aaj ke dor mein duniya ke kayi mulkon mein prostitution ko qanooni tor par jaiz kar diya gaya hai. Is waqt 65 se zyada mulkon mei prostitution ko qanooni aur regulated banaya ja chuka hai. Aise halat pehle kabhi nahi dekhe gaye the, lekin aaj hum dekhte hain ke yeh sabaq bhi Nabi ﷺ ke paigham ka ek hissa hai, jo humare samne har din ho raha hai.

Yeh sab nishaniyan ek proof hain ke Rasool Allah ﷺ sachay paighambar thay. Unhone jo baatain farmayi, woh sirf unki zati ilm ka hissa nahi thi, balkay yeh ilm Allah ki taraf se unhe diya gaya tha. Nabi ﷺ ne apni zindagi mei jo nishaniyan di, woh aaj ke dor mei sabit ho rahi hain, aur yeh sab kuch ek saboot hai ke aap ﷺ ne sachai ko sab se zyada samjha tha.