Raasta Hidayat Ka

Ummat ke har fard ke liye meri sab se badi tamanna aur naseehat yeh hai ke ap hamesha hidayat ke raaste ko dhoondo, wo raasta jo apko Allah ke qareeb, Rasool ﷺ ki sunnat, aur akhirat ki kamiyaabi tak le jaye.

Ye raasta asaan nahi, lekin roshan hai. Is raaste par chalte waqt apko kabhi duniya ki chamak dhamak gumrah karne ki koshish karegi, kabhi fitne, kabhi hawa-e-nafs, lekin apko har mor par Quran ko apna rehnuma banana hoga, Rasool ﷺ ki zindagi ko apna naqsha-e-raah banana hoga.

Apka asal mission yeh hona chahiye:

• Apne aap ko pehchano.
  
  

• Apne Rabb se rista mazboot karo.
  
  

• Ilm hasil karo, aisa ilm jo sirf aqal ko nahi, dil ko bhi roshan kare.
  
  

• Sabr aur taqwa ka daaman kabhi na chhoro.
  
  

• Aur hamesha haqq ke liye kharay raho, chahe poori duniya khilaf kyun na ho.
  
  

Yeh raasta tanha lagega, mushkil hoga, magar yaad rakho: jise Allah chah le, uska raasta kabhi tanha, adhura nahi rehta.

To mere bhaiyo aur behno, khud ko tayyar karo, ilm ke zariye, akhlaq ke zariye, aur iman ke zariye, taake tum hidayat ke is raaste ke rahnuma ban sako, sirf musafir nahi.

Ek aisi nasl zaroor uthegi jise zulm, fitnon aur andheron ka samna karna padega. Apka farz hai ke apne aap ko aur apni aane wali nasal ko is tarah tarbiyat do ke jab waqt aaye, to wo sirf dekhne wale na hon, wo haq ke liye kharay hone wale hon.

Unhein ilm do, lekin sirf kitaabi nahi, wo ilm jo dilon mein roshni bhar de. Unhein taqat do, lekin sirf jism ki nahi, wo taqat jo unhein haqq par sabit qadam rakhe. Apni parwarish is tarah karo ke har bacha ek mujahid ban kar uthe, jo sirf apne liye nahi, apni ummat, apne deen, aur insaniyat ke liye jeeta ho.

Yeh waqt sirf rehne ka nahi, jagne ka hai. Ab bhi waqt hai, khud ko badlo, taake kal tumhari nasl islam ki mohabat dil mei roshan rakh sakey.